"A mai plascha dad ir a scoula a l’IOF. Quia possa cumbinar stupend scoula cun sport, eu imprend üna pruna e n’ha chattà flots collegas."

Christian Toutsch (2016)

Sporta da passarella deschavel on da scoula

La preparaziun ideala per entrar cun success i’l muond professiunal o in üna scoula media, po gnir cumbinada cun sport


Cun seis nouv concept per üna "sporta da passarella" voul dar l’Institut Otalpin Ftan a tuot las scolaras e scolars la pussibiltà da’s preparar, davo la scoula reala o secundara, per ün giarsunadi o per l’access ad üna scoula media. I’l deschavel on da scoula vegnan approfundidas e schlargiadas las cumpetenzas acquistadas fin qua. La priorità vain missa sün lingua e matematica. Ils ulteriurs roms as drizzan seguond las pretaisas dal muond da la lavur e da la professiun. Cun quai dessan ils giuvenils pudair s’acquistar las tecnicas per imprender e per lavurar e pudair sviluppar lur persunalità e lur autonomia. Roms artistics promouvan la creatività e la cumpetenza sociala.

 

Il deschavel on da scoula a l’IOF es caracterisà da duos facturs centrals:

  • Ils giuvenils vegnan preparats pel passagi dal muond da la scoula al muond da la lavur. Els vegnan sustgnüts in tuot quai chi reguarda tscherner üna professiun, chattar üna plazza da giarsunadi o as preparar per imprender ün manster ch’els han fingià in vista.
  • Ils giuvenils pon as preparar per ün examen d’admissiun ad üna scoula media.

 

Il cuors consista da duos parts:

  • Scoula, quatter dis l’eivna
  • Di da practicum extern obain preparaziun per l’examen, ün di l’eivna. Davart la priorità decidan las scolaras ed ils scolars tenor lur bsögns.

Dis da practicum in ün’intrapraisa

Il di da practicum metta l’accent sün la relaziun cul muond dal manster e spordscha regularmaing la pussibiltà d’imprender a cugnuoscher il minchadi da la lavur. Ils giuvenils pon far experienzas in differentas spartas professiunalas, quai cun tour part als process da producziun o dal terz sectur. Els fan part d’ün’organisaziun e s’acquistan cun quai la capacità dad agir cun aigna respunsabiltà.

 

Dürant il semester fan ils giuvenils trais "giarsunadis da prouva" (Schnupperlehren). Per far quai survegnan els il sustegn necessari da la persuna chi’d es respunsabla per lur tscherna dal manster. Ultra da quai reflettan las scolaras ed ils scolars sur da las experienzas fattas, quai cun agüd da lur magistra o da lur magister.

Preparaziun per l’examen

Sco alternativa a la tschercha d’üna plazza da giarsunadi po l’accent gnir miss sün la preparaziun per l’examen d’admissiun ad üna scoula media. Las scolaras ed ils scolars approfundischan cumünaivel- ed individualmaing quai ch’els han imprais avant e survegnan implü la schanza da’s familiarisar cun la vart pratica d’ün examen. Cun agüd da strategias da lavur specialas – per exaimpel cun analisar il möd co cha las lezchas d’ün examen sun concepidas – vain dat a las scolaras ed als scolars l’instrumentari per gnir a bröch cun situaziuns d’examens.

Reflettar sia posiziun e coaching

Dürant il deschavel on da scoula pon ils giuvenils, cun agüd d’ün coaching tras üna psicologa diplomada, reflettar l’aigna posiziun (ingio suna, ingio vöglia rivar?). Quista cussagliaziun tils sustegna in lur svilup individual sco eir in lur ponderaziuns davart lur agir in situaziuns da conflict.

Las cundiziuns d’admissiun

Il deschavel on da scoula pon frequentar giuvenils motivats e pronts da prestar alch, quai davo avair absolt la terza classa secundara o üna fuormaziun equivalenta. Els stuvessan avair gnü bunas notas in scoula secundara, esser motivats dad ir a scoula ed esser pronts da’s dar fadia per ragiundscher lur böts. L’IOF piglia jent sü a scolaras ed a scolars tolerants e chi han jent contact.

Deschavel on da scoula plus sport

In nos deschavel on da scoula han giuvens talents la pussibiltà da cumbinar scoula e sport in ün möd optimal. In quista fasa decisiva pel svilup sportistic pon giuvenils ambiziunats as preparar per lur ulteriura fuormaziun, saja quai cun tour in vista ün giarsunadi o saja quai cun tour in vista l’examen per entrar in üna scoula media. Ed al listess temp hana l’occasiun da trenar mincha di intensivmaing in nossa classa da sport obain da far sport per lur plaschair (funsport).

 

I tils stan a disposiziun ils meglders trenaders ed üna bunischma infrastructura, ingio chi han fingià trenà scolars chi han in seguit guadagnà medaglias olimpicas. L’IOF es la basa d’alenamaint ufficiala da la promoziun pel sport da cumpetiziun illa regiun ed üna da las scoulas da sport culs plü gronds success in Svizra.

Nos internat

L’atmosfera familiara tant vers inaint co vers inoura da l’IOF es cuntschainta. Nossas collavuraturas e noss collavuraturs da l’internat sun qua per assister a las scolaras ed als scolars cur ch’els han dabsögn, e quai dürant set dis l’eivna. Els tils accumpognan dürant ils temps da stüdi ed organiseschan ün vast program pel temp liber. A las scolaras ed als scolars stan a disposiziun chombras confortablas e numerus locals per activitats cumünaivlas.

 

Eir sur las fins d’eivna es Lur uffant custodi. Id es pisserà per üna vasta sporta dad activitats. Quellas vegnan per part eir organisadas svess dals scolars, tuot tenor lur interess.

Ils cuosts

Cuosts per la scoula

Per scolaras e scolars cun domicil i’l chantun Grischun s’amunta la taxa per la scoula a CHF 1‘750.– l’on. Pro vegnan cuosts per material, occurrenzas internas e per l’administraziun da CHF 1‘500.– l’on.

 

Cuosts per internat e dunzaina

Per scolaras e scolars cun domicil i’l chantun Grischun s’amunta la taxa pauschalmaing CHF 11‘300.– l’on

 

Hana amo dumondas?

Per ulteriuras infuormaziuns Tillas e Tils sta a disposiziun duonna Patrizia Peer, Head of Admissions. Ella s’allegra schi piglian sü contact cun ella.

 

Institut Otalpin Ftan

Sporta da passarella deschavel on da scoula

Patrizia Peer, Head of Admissions

Tel. +41(0)81 22 82 obain beratung@hif.ch

© Hochalpines Institut Ftan AG • Impressum/Rechtliches