"Illa scoula media professiunala survegna üna vasta fuormaziun generala. In seguit possa far la matura professiunala, quai chi’m dà plü tard la pussibiltà da lavurar tant i’l sectur d’educaziun co eir da sandà."

Ella Gossweiler, scoula media professiunala (2016)

La Scoula media professiunala cun matura

Amplifichar la fuormaziun generala e promouver il svilup da la persunalità


La scoula media professiunala cun matura professiunala es fatta per glieud giuvna chi voul s’acquistar üna vasta fuormaziun generala. Ultra da las cumpetenzas scolasticas promouva ella eir las cumpetenzas persunalas, socialas e metodicas. Ella prepara als absolvents in ün möd optimal per ün’ulteriura scolaziun professiunala i’ls secturs da sandà e da pedagogia.

La scolaziun

Cun la scoula media professiunala (FMS) as cumainza davo il novavel on da scoula. Scolaras e scolars chi han, davo il temp obligatori da scoula, l’intenziun da’s scolar inavant illas spartas da sandà o da pedagogia, quels fan cun la scoula media professiunala la dretta tscherna. A giuvenils chi nu san amo in che direcziun ch’els vöglian ir, a quels po quista scoula, cun l’instrucziun chi infuorma sur da differents mansters, cun l’instrucziun da psicologia e cun las eivnas da practicum obligatorias, servir sco agüd per s’orientar. Davo avair absolt la scoula media professiunala as poja far la matura professiunala chi permetta l’access a las scoulas otas professiunalas.

La structura da la scolaziun

In classas pitschnas as procuran nossas absolventas e noss absolvents üna fuormaziun da basa, las cugnuschentschas in vista a lur professiun futura ed els augmaintan lur cumpetenzas persunalas, socialas  e metodicas. Dürant il prüm on da scoula survegnan els agüd surtuot in vista a la tscherna da lur futur manster. Dürant il seguond ed il terz on vain miss il pais sün quels chomps da professiun tschernüts da las singulas scolaras e dals singuls scolars. Dürant las eivnas da practicum pon els as far ün purtret a reguard las pretaisas da la futura fuormaziun professiunala.

 

Metodas d’instrucziun e da lavur modernas sco eir la lavur obligatoria independenta promouvan il svilup da las cumpetenzas persunalas e socialas. Nossa plattafuorma electronica OLAT (Online Learning and Training) facilitescha als scolars da far lur lezchas. Sur il cudesch da classa electronic "WebUntis" vegnan els plünavant tgnüts al curraint per quai chi reguarda datas relevantas in vista a l’instrucziun.

 

La scoula media professiunala es üna buna preparaziun per numerusas perspectivas professiunalas in fich differentas spartas.

 

Professiuns i’l chomp social e d’educaziun

  • muossader o muossadra da scoulina
  • magister o magistra primara o secundara
  • magister o magistra da ritmica e da gimnastica
  • psicolog o psicologa diplomada

 

Professiuns i’l chomp da la sandà

  • fisioterapeut/-a
  • ergoterapeut/-a
  • cusgliader o cusgliadra da nudritüra
  • igieniker o igienicra dentala
  • assistent/-a da meidi
  • fliunz/-a d’amalats

 

Ulteriuras professiuns

  • turistiker o turisticra
  • schurnalist/-a per differentas medias
  • magister o magistra da sport
  • professiuns ill’hotellaria
  • cusgliader o cusgliadra da marketing
  • professiuns ill’informatica
  • actur/-a
  • professiuns musicalas

La matura professiunala

La scoula media professiunala vain conclüsa cul diplom, arcugnuschü in tuot la Svizra. El permetta l’access a las scoulas superiuras professiunalas per as scolar inavant illa professiun chi s’ha tschernü.

 

Per s’acquistar la matura professiunala voula, davo il diplom, ün quart on da practicum illa professiun tschernüda. Cun la matura professiunala as poja ir a stübgiar a las scoulas otas professiunalas.

Las cundiziuns d’admissiun

Per entrar illa scoula media professiunala voula ün examen in scrit.

 

Per entrar illa scoula media professiunala davo la seguonda o terza classa secundara: illa lingua chi’s declera svess sco prüma lingua, dimena tudais-ch, rumantsch obain talian, ed ultra da quai in inglais ed in aritmetica/algebra/geometria.

 

Davo la terza classa dal gimnasi as poja entrar illa scoula media professiunala sainz’examen.

Nos cuors da preparaziun

Nos cuors da preparaziun dà apunta la schanza a scolaras ed a scolars, saja da la sesavla classa primara, saja da la seguonda o terza classa secundara, da’s preparar sco chi tocca pels examens d’admissiun chantunals pel gimnasi, per la scoula da commerzi o per la scoula media professiunala.

Nos internat

L’atmosfera familiara tant vers inaint co vers inoura da l’IOF es cuntschainta. Nossas collavuraturas e noss collavuraturs da l’internat sun qua per assister a las scolaras ed als scolars cur ch’els han dabsögn, e quai dürant set dis l’eivna. Els tils accumpognan dürant ils temps da stüdi ed organiseschan ün vast program pel temp liber. A las scolaras ed als scolars stan a disposiziun chombras confortablas e numerus locals per activitats cumünaivlas.

 

Eir sur las fins d’eivna es Lur uffant custodi. Id es pisserà per üna vasta sporta dad activitats. Quellas vegnan per part eir organisadas svess dals scolars, tuot tenor lur interess.

Nossa classa da sport

L’IOF es la basa d’alenamaint ufficiala da la promoziun pel sport da cumpetiziun illa regiun ed üna da las scoulas da sport culs plü gronds success in Svizra. Giuvens talents survegnan, in nossa classa da sport, la pussibiltà da cumbinar scoula cun sport da prestaziun, e quai sainza tour in cumpra üna prolungaziun dal temp da scoula.

 

Nossas trenadras e noss trenaders spordschan a mincha sportista ed a mincha sportist ün ambiaint d’alenamaint optimal, saja quai i’l team dal sport da cumpetiziun, ingio cha’ls talents vegnan promovüts intensivmaing e tenor lur bsögns individuals, o saja quai illa gruppa da fun-sport, ingio cha eir scolars main ambiziunats pon profitar d’ün training professiunal.

Ils cuosts

Ils cuosts definitivs per Lur uffant as cumpuonan da la taxa da basa per la scoula e da taxas per eventualas sportas supplementaras sco per exaimpel per la classa da sport o per l’internat.

 

Illa classa da sport spordschaina dad üna vart ün training da cumpetiziun intensiv, chi s‘adatta individualmaing al livel actual dal giuvenil cun ambiziuns da far sport da prestaziun, da l’otra vart han tschels giuvenils sportivs la pussibiltà da far part da la gruppa da sport da fun e da trenar i’l local da fitness.

 

La Società da promoziun da la Regiun dal Parc naziunal promouva il sport da skis. Scolaras e scolars da la Regiun dal Parc naziunal profitan dimena da taxas redüttas. Els ston però esser commembers da la Società da promoziun da la Regiun dal Parc naziunal.

 

Jent Tillas e Tils faina ün’offerta detagliada in occasiun d’üna discussiun.

Hana amo dumondas?

Chi’ns contacteschan schi han amo dumondas chi reguardan nossas sportas scolasticas, nossa vita dal minchadi obain nos internat.

 

No ans allegrain da Tillas e Tils imprender a cugnuoscher ed ans pigliain jent il temp per discuter tuot a fuond.

 

I s’inclegia cha no Tillas e Tils muossain jent nossa scoula. Lur uffant po eir gnir ün pêr dis a prouvas in üna da nossas classas.

 

Tel. +41 (0)81 861 22 11 obain beratung@hif.ch

© Hochalpines Institut Ftan AG • Impressum/Rechtliches