"Ich besuche das Gymnasium, weil ich eine gute Ausbildung machen möchte und ich finde es toll, dass man im HIF auch Schule und Sport sehr gut kombinieren kann."

Helena Guntern, Gymnasium (2016)

Il Gimnasi

As preparar in ün möd optimal per ün stüdi


Il gimnasi spordscha üna fuormaziun generala vasta e solida. L’examen da matura permetta l’access a tuot las scoulas otas sco eir l’admissiun als examens federals per ün stüdi da medicina. Üna fuormaziun gimnasiala promouva l’intelligenza, la voluntà, la sensibiltà in reguards etics ed artistics sco eir las capacitats fisicas.

La scolaziun

Ün aspet central illa scolaziun gimnasiala, chi vain conclüsa cun l’examen da matura, es – ultra dad instruir la materia – eir da muossar tecnicas per cha las scolaras ed ils scolars imprendan co chi’d es da lavurar sco eir strategias per ch’els imprendan a schoglier problems. Ün pais particular vain miss sün la capacità da pudair lavurar independentamaing e da pudair lavurar vi da progets in ün team.

 

Cun s’acquistar las cugnuschentschas e las capacitats da basa sco eir cugnuschentschas plü fundadas in singuls roms imprendan nossas scolaras e noss scolars eir metodas da lavurar e pussibilitats per s’orientar in üna sporta dad infuormaziuns scientificas. La lavur da matura tils permetta da metter il focus dürant ün on sün ün tema ch’els han tschernü svess. Cun quai imprendan els a lavurar tenor criteris scientifics.

La structura da la scolaziun

La scolaziun as cumpuona da roms da basa, roms d’accent e roms cumplementars, quai chi correspuonda al böt general dal gimnasi, ma chi piglia eir resguard sün las preferenzas individualas da las scolaras e dals scolars. Nossas magistras e noss magisters lavuran cun metodas modernas. Nossa plattafuorma electronica OLAT (Online Learning and Training) facilitescha als scolars da far lur lezchas. Sur il cudesch da classa electronic "WebUntis" vegnan els plünavant tgnüts al curraint per quai chi reguarda datas relevantas in vista a l’instrucziun.

 

Roms da basa

Ils roms da basa fuorman il fundamaint obligatori da la scolaziun gimnasiala. Tuot tenor lur capacitats e lur interess tschernan ils giuvenils ultra da quai roms d’accent e roms cumplementars. Quels vegnan instruits a partir da la quarta respectivmaing tschintschavla classa.

 

Linguas: Tudais-ch ed inglais e sco terza as poja tscherner tanter üna da las linguas naziunalas: talian, frances obain rumantsch

 

Matematica e scienzas natüralas: Matematica, biologia, chemia e fisica

 

Scienzas umanas e socialas: Istorgia, geografia ed introducziun in economia e dret

 

Art: Art figürativa e musica

 

Roms d‘accent

Cun tscherner quists roms mettan ils giuvenils l’accent sün la direcziun da lur fuormaziun gimnasiala: "fisica e matematica applichada" e "economia e dret"

 

Roms cumplementars

Sco roms cumplementars pon gnir tschernüts:

Istorgia, musica, sport e informatica

L’examen da matura

L’attestat da matura permetta dad ir a stübgiar als Polytecnicums federals, a tuot las universitats chantunalas in Svizra sco eir ad universitats a l’ester. Ultra da quai dà l’attestat il dret da far ils examens federals per ir a stübgiar medicina. Ils examens per la matura chantunala, arcugnuschüda da la Confederaziun, as faja a la fin da la sesavla classa dal gimnasi a l’IOF svess.

 

La survaglianza sur da l’examen, tenor il Reglamaint federal d’arcugnuschentscha da matura (MAR) es l’incumbenza dal Chantun Grischun.

La matura bilingua

A l’Institut Otalpin Ftan pon scolaras e scolars da la regiun far la matura bilingua in rumantsch e tudais-ch. Cun quai survegnan els ün’instrucziun chi tils permetta d‘approfundir lur cumpetenzas in rumantsch, sainza cha l’instrucziun dal tudais-ch vegna negletta. La matura bilingua es la premissa per s’acquistar plü tard la patenta da magister cul dret dad instruir rumantsch e tudais-ch.

Las cundiziuns d’admissiun

Per entrar i’l gimansi voula ün examen d’access in scrit.

 

Per entrar i’l gimnasi davo la sesavla classa primara as vain examinà: illa lingua chi’s declera svess sco prüma lingua, dimena in tudais-ch, rumantsch obain talian, ed ultra da quai in matematica.

 

Per entrar i’l gimnasi davo la seguond o terza classa secundara as vain examinà: illa lingua chi’s declera svess sco prüma lingua, dimena tudais-ch, rumantsch obain talian, ed ultra da quai in inglais ed in aritmetica/algebra/geometria.

 

Ulteriuras infuormaziuns sur dals examens d’admissiun as chatta eir pro l’Uffizi per la fuormaziun media superiura dal chantun Grischun.

Nos cuors da preparaziun

Nos cuors da preparaziun dà apunta la schanza a las candidatas ed als canditats, saja da la sesavla classa primara, saja da la seguonda o terza classa secundara, da’s preparar sco chi tocca pels examens d’admissiun chantunals.

Nos internat

L’atmosfera familiara tant vers inaint co vers inoura da l’IOF es cuntschainta. Nossas collavuraturas e noss collavuraturs da l’internat sun qua per assister a las scolaras ed als scolars cur ch’els han dabsögn, e quai dürant set dis l’eivna. Els tils accumpognan dürant ils temps da stüdi ed organiseschan ün vast program pel temp liber. A las scolaras ed als scolars stan a disposiziun chombras confortablas e numerus locals per activitats cumünaivlas.

 

Eir sur las fins d’eivna es Lur uffant custodi. Id es pisserà per üna vasta sporta dad activitats. Quellas vegnan per part eir organisadas svess dals scolars, tuot tenor lur interess.

Nossa classa da sport

L’IOF es la basa d’alenamaint ufficiala da la promoziun pel sport da cumpetiziun illa regiun ed üna da las scoulas da sport culs plü gronds success in Svizra. Giuvens talents survegnan, in nossa classa da sport, la pussibiltà da cumbinar scoula cun sport da prestaziun, e quai sainza tour in cumpra üna prolungaziun dal temp da scoula.

 

Nossas trenadras e noss trenaders spordschan a mincha sportista ed a mincha sportist ün ambiaint d’alenamaint optimal, saja quai i’l team dal sport da cumpetiziun, ingio cha’ls talents vegnan promovüts intensivmaing e tenor lur bsögns individuals, o saja quai illa gruppa da fun-sport, ingio cha eir scolars main ambiziunats pon profitar d’ün training professiunal.

Ils cuosts

Ils cuosts definitivs per Lur uffant as cumpuonan da la taxa da basa per la scoula e da taxas per eventualas sportas supplementaras sco per exaimpel per la classa da sport o per l’internat.

 

Illa classa da sport spordschaina dad üna vart ün training da cumpetiziun intensiv, chi s‘adatta individualmaing al livel actual dal giuvenil cun ambiziuns da far sport da prestaziun, da l’otra vart han tschels giuvenils sportivs la pussibiltà da far part da la gruppa da sport da fun e da trenar i’l local da fitness.

 

La Società da promoziun da la Regiun dal Parc naziunal promouva il sport da skis. Scolaras e scolars da la Regiun dal Parc naziunal profitan dimena da taxas redüttas. Els ston però esser commembers da la Società da promoziun da la Regiun dal Parc naziunal.

 

Jent Tillas e Tils faina ün’offerta detagliada in occasiun d’üna discussiun.

Hana amo dumondas?

Chi’ns contacteschan schi han amo dumondas chi reguardan nossas sportas scolasticas, nossa vita dal minchadi obain nos internat.

 

No ans allegrain da Tillas e Tils imprender a cugnuoscher ed ans pigliain jent il temp per discuter tuot a fuond.

 

I s’inclegia cha no Tillas e Tils muossain jent nossa scoula. Lur uffant po eir gnir ün pêr dis a prouvas in üna da nossas classas.

 

Tel. +41 (0)81 861 22 11 obain beratung@hif.ch

© Hochalpines Institut Ftan AG • Impressum/Rechtliches