L’atmosfera familiara tant vers inaint co eir vers inoura da l’IOF es cuntschainta. Nossas collavuraturas e noss collavuraturs da l’internat sun qua per assister a las scolaras ed als scolars cur chi fa dabsögn, e quai dürant set dis l’eivna. Els accumpognan als scolars dürant ils temps da stüdi ed organiseschan ün vast program pel temp liber.

L’internat

Viver insembel – imprender insembel


In nos internat vivan scolaras e scolars da differentas naziuns in cumünanza. Grazcha a la preschentscha da plüssas culturas, linguas e persunalitats imprendan noss giuvenils a trattar ad oters cun stima e respet ed a sviluppar lur cumpetenzas socialas.

 

No sustgnain la voluntà da prestar alch e lain svagliar e promouver il plaschair da viver e dad imprender pro nossas scolaras e pro noss scolars i’l internat. Els dessan sviluppar ün sen da respunsabiltà, ün’avertezza culturala e creatività.

Adüna bain custodits

In ün’atmosfera da toleranza e da plaschair da viver sta nos team da l’internat adüna a disposiziun a noss giuvenils per tils cusgliar e güdar in dumondas scolasticas e persunalas.

 

Las collavuraturas ed ils collavuraturs accumpognan a las scolaras ed als scolars dürant il temp da stüdi e pisseran per bleras activitats pel temp liber. Eir sur la fin d’eivna sun ils giuvenils custodits e pon profitar dad üna sporta dad activitats specialas.

Il team da l’internat

Joe Zangerl, manader da l’internat

Ruth Beyeler, manadra substituta da l’internat

Bernd Mall

Andreas Overath

Structura dal di e reglas

No vain üna clera structura dal di, quai chi promouva la morala da lavur ed ün ritem da lavur regular. Las scolaras ed ils scolars imprendan valurs importantas, tanter oter ad esser punctuals, a’s cumportar bain ed a surtour aigna respunsabiltà.

 

Reglas radschunaivlas e cleras güdan als giuvenils a tour resguard ed ad esser disciplinats. In ün möd fair e familiar, però eir consequent pisseraina per cha las reglas vegnan observadas. Dürant lur temp da scoula surpiglian ils giuvenils vieplü respunsabiltà e survegnan daplü libertà per organisar svess lur minchadi e lur möd da viver. Las premissas chi decidan sun l’età, las prestaziuns in scoula, la motivaziun persunala da vulair rivar a bunas prestaziuns e la prontezza da s’impegnar a favur da la convivenza scolastica.

Activitats dal temp liber

Ultra da multifarias activitats chi vegnan organisadas dal team da l’internat han noss giuvenils üna pruna pussibiltats per lur bsögns individuals dal minchadi.

 

Il center da la vita d‘internat es la medioteca. Là as rechatta ün sogiuorn, ün local cun computers ed üna biblioteca bain dotada. Üna maisa da billard, maisas da mini-football e da pingpong cumpletteschan l‘equipamaint. Ultra da quai sta a disposiziun ün local da televisiun. Scolaras e scolars cun ambiziuns musicalas pon far adöver dal clavazin cun cua ill’aula per exercitar.

 

Illa halla da gimnastica as rechatta üna paraid per rampchar. Tanter ils indrizs per far sport vaina eir ün trampolin ed ün outdoor-tramp. Il grond local modern da fitness spordscha bleras pussibiltats per trenar.

 

Our i‘l liber esa plazzas da tennis e da ballapè ingio chi’d es pussibel eir da montar üna rait per giovar a volleyball. Davo la chasa esa ün indriz per giovar a streetbasketball. La miniramp, güst’installada, sco eir il downhill-freeride-parcour, miss ad ir da nossas scolaras e noss scolars, po gnir dovrà per trenar na be dals scolars da la classa da sport, dimpersè eir da tschels scolars cun ambiziuns sportivas.

 

La cuntrada impreschiunanta da l’Engiadina Bassa invida a las scolaras ed als scolars na be ad imprender, ma eir a’s dedichar a differentas activitats sportivas; quai s’extenda da pudair rampchar, ir a sella o cul velo dürant la stà fin ad ir culs skis, cul snowboard o a far passlung dürant l’inviern. In vicinanza da la scoula maina üna s-chabellera directamaing illa regiun da skis da Motta Naluns. La loipa per far passlung e las vias per chaminar o per ir culla schlitra sun güst davant chasa. Far sport in üna natüra pumpusa, far amicizchas ed imprender cun success, quai tocca a Ftan pro la vita dal minchadi.

Allogi e nudritüra

A las scolaras ed als scolars stan a disposiziun stanzas comfortablas e numerus locals per activitats cumünaivlas. I’l internat esa passa settanta stanzas.

 

Il concept da nudritüra

Bsögns culinarics vegnan tuts sül seri a l’IOF. No dain importanza ad üna nudritüra equilibrada, gustusa e sana, preparada cun prodots da qualità e chi derivan da la regiun. Nos concept da nudritüra vaina sviluppà insembel cul maister-cuschinunz Eduard Hitzberger. Da noss menüs ligers as vain bainschi saduol, ma els nu paisan sül stomi e nun impedischan ne ün stüdi concentrà ne las activitats sportivas.

 

Sur dad Eduard Hitzberger

Il cuschinunz innovativ, cuntschaint per sia cuschina sana, viva daspö circa 20 ons a Ftan. El tocca, cun 18 puncts da Gault-Millau e cun duos stailas da Michelin, pro’l meglders cuschinunzs da la Svizra.

Hana amo dumondas?

Chi’ns contacteschan schi han amo dumondas chi reguardan nossas sportas scolasticas, nossa vita dal minchadi obain nos internat.

 

No ans allegrain da Tillas e Tils imprender a cugnuoscher ed ans pigliain jent il temp per discuter tuot a fuond.

 

I s’inclegia cha no Tillas e Tils muossain jent nossa scoula. Lur uffant po eir gnir ün pêr dis a prouvas in üna da nossas classas.

 

Tel. +41 (0)81 861 22 11 obain beratung@hif.ch

Persuna da contact

Joe Zangerl
Manader da l’internat
+41 (0)81 861 22 01
 internat@hif.ch

© Hochalpines Institut Ftan AG • Impressum/Rechtliches