"Eu m’ha decis per la scoula secundara a l’IOF perquai cha sun ün giovader paschiunà da hockey sün glatsch e perquai cha poss quia cumbinar stupend scoula cun training."

Florian Haller, scoula secundara (2016)

La Scoula secundara

Üna buna basa per differentas perspectivas


La scoula secundara düra trais ons. Ella es üna basa scolastica importanta per ulteriuras scoulas o per ün giarsunadi. Promovü vain ün pensar independent, la capacità per l’expressiun linguistica e per ün indschegn artistic sco eir la voluntà per l’aigna prestaziun e per surtour aigna respunsabiltà. Davo la scoula secundara as cumainza ad imprender ün manster cun far ün giarsunadi o i’s as prepara per l’examen d’access per frequentar il gimnasi o la scoula da commerzi o la scoula media professiunala.

La scolaziun

Nossa scolaziun correspuonda al plan d‘instrucziun illas scoulas secundaras publicas. No preparain a las scolaras ed als scolars pels differents examens d’access per ulteriuras scoulas e tils dan ün’invista illa futura vita professiunala cun metter a disposiziun eivnas da scoula per ir a far visitas in differentas intrapraisas (Schnupperwochen).

 

Illa seguonda e terza classa mettaina ün grond pais sün la cussagliaziun da manster. Importanta es plünavant l’instrucziun dad informatica e da comunicaziun. Grazcha als differents tips da scoula media preschaints a l’IOF pon profitar eir las scolaras ed ils scolars da la scoula secundara dad üna vasta sporta i’ls secturs da musica e da sport e dad oters roms facultativs.

Nos internat

L’atmosfera familiara tant vers inaint co vers inoura da l’IOF es cuntschainta. Nossas collavuraturas e noss collavuraturs da l’internat sun qua per assister a las scolaras ed als scolars cur ch’els han dabsögn, e quai dürant set dis l’eivna. Els tils accumpognan dürant ils temps da stüdi ed organiseschan ün vast program pel temp liber. A las scolaras ed als scolars stan a disposiziun chombras confortablas e numerus locals per activitats cumünaivlas.

 

Eir sur las fins d’eivna es Lur uffant custodi. Id es pisserà per üna vasta sporta dad activitats. Quellas vegnan per part eir organisadas svess dals scolars, tuot tenor lur interess.

Nossa classa da sport

L’IOF es la basa d’alenamaint ufficiala da la promoziun pel sport da cumpetiziun illa regiun ed üna da las scoulas da sport culs plü gronds success in Svizra. Giuvens talents survegnan, in nossa classa da sport, la pussibiltà da cumbinar scoula cun sport da prestaziun, e quai sainza tour in cumpra üna prolungaziun dal temp da scoula.

 

Nossas trenadras e noss trenaders spordschan a mincha sportista ed a mincha sportist ün ambiaint d’alenamaint optimal, saja quai i’l team dal sport da cumpetiziun, ingio cha’ls talents vegnan promovüts intensivmaing e tenor lur bsögns individuals, o saja quai illa gruppa da fun-sport, ingio cha eir scolars main ambiziunats pon profitar d’ün training professiunal.

Ils cuosts

Ils cuosts definitivs per Lur uffant as cumpuonan da la taxa da basa per la scoula e da taxas per eventualas sportas supplementaras sco per exaimpel per la classa da sport o per l’internat.

 

Illa classa da sport spordschaina dad üna vart ün training da cumpetiziun intensiv, chi s‘adatta individualmaing al livel actual dal giuvenil cun ambiziuns da far sport da prestaziun, da l’otra vart han tschels giuvenils sportivs la pussibiltà da far part da la gruppa da sport da fun e da trenar i’l local da fitness.

 

La Società da promoziun da la Regiun dal Parc naziunal promouva il sport da skis. Scolaras e scolars da la Regiun dal Parc naziunal profitan dimena da taxas redüttas. Els ston però esser commembers da la Società da promoziun da la Regiun dal Parc naziunal.

 

Jent Tillas e Tils faina ün’offerta detagliada in occasiun d’üna discussiun.

Hana amo dumondas?

Chi’ns contacteschan schi han amo dumondas chi reguardan nossas sportas scolasticas, nossa vita dal minchadi obain nos internat.

 

No ans allegrain da Tillas e Tils imprender a cugnuoscher ed ans pigliain jent il temp per discuter tuot a fuond.

 

I s’inclegia cha no Tillas e Tils muossain jent nossa scoula. Lur uffant po eir gnir ün pêr dis a prouvas in üna da nossas classas.

 

Tel. +41 (0)81 861 22 11 obain beratung@hif.ch

© Hochalpines Institut Ftan AG • Impressum/Rechtliches