"A l’IOF n’haja pudü far la matura cun success ed al listess temp am concentrar plainamaing sül sport da prestaziun."

Nevin Galmarini, snowboarder da professiun ed anteriur scolar da la classa da sport

La classa da sport

Sviluppar la persunalità e gnir promovü in ün möd individual in scoula ed i‘l sport


L’Institut Otalpin Ftan (IOF) es üna da las scoulas da sport culs plü gronds success in Svizra. Quia as rechattan las cellas da training ufficialas da l’Uniun grischuna da skis (BSV) per las disciplinas snowboard e ski nordic. Ultra da quai es l’IOF ün center regiunal da prestaziun (RLZ) da Swiss Ski Alpin.

 

L’IOF spordscha ün ambiaint scolastic e sportiv ideal per sportistas e sportists da prestaziun sco eir per sportistas e sportists da fun chi sun main ambiziunats, e quai illas disciplinas passlung, ski alpin e freestyle, snowboard alpin e freestyle e hockey sün glatsch. Per la disciplina da biatlon collaruvaina cun la basa d’alenamaint da la Svizra orientala (BSO).

Disciplinas

Passlung e biathlon

Ski alpin

Snowboard alpin

Ski/Snowboard Freestyle

Hockey sün glatsch

Società da promoziun RPN

La solaziun

A l’IOF pon giuvens talents e giuvenils paschiunats pel sport cumbinar sport da cumpetiziun obain sport da fun cun la fuormaziun scolastica, e quai sainza tour in cumpra üna prolungaziun dal temp da scoula. Las sportistas ed ils sportists fan part da las classas regularas. Ün program special per assister als sportists garantischa la coordinaziun tanter scoula e sport.

 

Süls interess individuals ed il svilup da la persunalità da mincha scolara e scolar da la classa da sport vain tut resguard. Il pais vain miss sün lur stadi da svilup, independentamaing da lur livel da prestaziun. Facturs decisivs sun il plaschair e la motivaziun da ragiundscher ils böts scolastics ed eir sportivs. Illa classa da sport po entrar mincha scolara e mincha scolar da mincha tip da scoula a mincha temp.

Infrastructura

L’IOF as rechatta in üna cuntrada muntagnarda unica e dispuona d’ün’infrastructura grondiusa per far sport.

 

Implants per trenar: Halla da gimnastica cun trampolin, local cun ergometer, local da fitness e da gimnastica, miniramp, local da terapia, duos plazzas da tennis, chomp da ballapè, pista da sprint da 100 meters, miniramp per skateboards, slackline, numerusas sendas per ir cul bike e per chaminar i’ls contuorns. In tschinch minuts a pè as riva pro la s-chabellera da Ftan. Loipa da passlung, implant da tir per biatlon, pistas da ski e sendas per chaminar d’inviern davant porta. Funpark davo la scoula. Bogn per nodar, halla da glatsch, plazza da glatsch, plazza da golf ed implant per rampchar circa in distanza da desch minuts cul auto.

 

Ulteriurs lös per trenar: Scuol, Samignun, Tavo, Laax ed oters plü. Ultra da quai differentas regiuns per ir culs skis la stà sco per exaimpel Stelvio, Schnalstal, Pitztal, Kaunertal (in üna distanza dad üna fin duos uras e mez cul auto).

Il team da la classa da sport

Muriel Hüberli, manadra classa da sport, trenadra passlung

Odd Kåre Sivertsen, scheftrenader classa da sport e trenader passlung

Buolf Näff, assistent manadra classa da sport

Aita Stupan-Weber, coordinatura scoula e sport

Manuel Dietrich, scheftrenader ski e snowboard freestyle

Herbert Sturm, scheftrenader ski alpin

René Hürlimann, trenader cundiziun e snowboard alpin

Corinne Tschalär, trenadra ski alpin, athletic e cundiziun

Jindra Oldrich, trenader CdH Engiadina

Società da promoziun da la regiuna dal parc naziunal

Sportistas e sportists da la regiun vegnan sustgnüts finanzialmaing illas disciplinas ski alpin, passlung, snowboard e hockey sün glatsch. Pro la regiun toccan l’Engiadina Bassa, la Val Müstair e Samignun. La Società da promoziun da la Regiun dal Parc naziunal (FV RPN) surpiglia üna gronda part da la contribuziun annuala a la classa da sport. L’alenamaint e las concurrenzas vegnan organisadas da la classa da sport da l’IOF.

Nossa sporta d’assistenza e da terapia

Per garantir ün’assistenza cumplessiva mettaina a disposiziun a las sportistas ed als sportists differentas terapias, quai per sustgnair la regeneraziun o per güdar in cas da feridas o da malatias ed eir pel bainstar psichic e fisic. Pel mumaint spordschaina las seguaintas terapias: terapia craniosacrala, kinesiologia, massascha e fisioterapia.

 

Nos Internat

L’atmosfera familiara tant vers inaint co vers inoura da l’IOF es cuntschainta. Nossas collavuraturas e noss collavuraturs da l’internat sun qua per assister a las scolaras ed als scolars cur ch’els han dabsögn, e quai dürant set dis l’eivna. Els tils accumpognan dürant ils temps da stüdi ed organiseschan ün vast program pel temp liber. A las scolaras ed als scolars stan a disposiziun chombras confortablas e numerus locals per activitats cumünaivlas.

 

Scolaras e scolars da la classa da sport tiran a nüz las fins d’eivna per l’alenamaint e per cumpetiziuns, o ch’els profitan dad üna gronda sporta dad activitats specialas. Dürant l’eivna han ils giuvenils bleras pussibiltats per passantar lur temp liber, eir a favur dad interess individuals.

Las cundiziuns d’admissiun

Entrar illa classa da sport as poja davo cha’l trenader respunsabel per la disciplina tschernüda s’ha fat ün purtret sur dal talent da la candidata o dal candidat. Ultra da quai vain pretaisa üna visita pro ün meidi da sport. Las sportistas ston implir ün questiunari dal Female Athlete Triad.

Ils cuosts

Ils cuosts definitivs per Lur uffant as cumpuonan da la taxa da basa per la scoula e da taxas per eventualas sportas supplementaras sco per exaimpel per la classa da sport o per l’internat.

 

Illa classa da sport spordschaina dad üna vart ün training da cumpetiziun intensiv, chi s‘adatta individualmaing al livel actual dal giuvenil cun ambiziuns da far sport da prestaziun, da l’otra vart han tschels giuvenils sportivs la pussibiltà da far part da la gruppa da sport da fun e da trenar i’l local da fitness.

 

La Società da promoziun da la Regiun dal Parc naziunal promouva il sport da skis. Scolaras e scolars da la Regiun dal Parc naziunal profitan dimena da taxas redüttas. Els ston però esser commembers da la Società da promoziun da la Regiun dal Parc naziunal.

 

Jent Tillas e Tils faina ün’offerta detagliada in occasiun d’üna discussiun

Hana amo dumondas?

Chi’ns contacteschan schi han amo dumondas chi reguardan nossas sportas scolasticas, nossa vita dal minchadi obain nos internat.

 

No ans allegrain da Tillas e Tils imprender a cugnuoscher ed ans pigliain jent il temp per discuter tuot a fuond.

 

I s’inclegia cha no Tillas e Tils muossain jent nossa scoula. Lur uffant po eir gnir ün pêr dis a prouvas in üna da nossas classas.

 

Tel. +41 (0)81 861 22 87 obain info@sportklasse.ch

© Hochalpines Institut Ftan AG • Impressum/Rechtliches