L’Institut Otalpin Ftan (IOF) es la scoula internaziunala e la scoula regiunala da l’Engiadina Bassa. Id es üna scoula situada immez üna cuntrada impreschiunanta. L’IOF voul esser üna scoula per la vita per futurs "leaders". Scolaras e scolars da tuot il muond, chi sun pronts da prestar alch, pon quia, in üna natüra da bellezza, as preparar cun success per lur avegnir.

l'Institut Otalpin Ftan

Imprender sün ot livel


L’Institut Otalpin Ftan voul esser üna part indispensabla dal sectur da l’educaziun in Engiadina Bassa. Per no vala, eir per l’avegnir, il testamaint da nos fundatur Andrea Rosius à Porta (1754 – 1838) chi ha fundà l’Institut dal 1793. No lain promouver in ün möd modern e sün ot livel a nossas scolaras ed a noss scolars, tils sustgnair cun pretender dad els disciplina e la voluntà da prestar alch. Uschè laina tils preparar per la scoula da la vita – in ün chomp regiunal, naziunal ed internaziunal.

 

Cun promouver la capacità da star sün agens peis ed il sentimaint da respunsabiltà sustegna l’IOF na be il success scolastic da las scolaras e dals scolars, dimpersè eir lur cumpetenza sociala, üna valur importanta per ün avegnir portà da success. Quistas valurs laina viver mincha di.

L’istorgia da l’IOF

L’IOF po verer inavo sün ün lung passà. Als 1. october 1793 vain el fundà dad Andrea Rosius à Porta, magister e figl d’ün ravarenda. Il motiv d’eira chi nu daiva da quel temp ingüna scoula in Engiadina pels uffants da famiglias plü benestantas. Da prüma davent ha à Porta tut sü eir a mattas in sia scoula. Influenzà da Johann Heinrich Pestalozzi, ha el rapreschantà üna pedagogia cun ün’instrucziun chi tegna quint dals bsögns individuals e chi dà inavant il savair cun amiaivlezza, cun pazienza e cun bainvuglientscha. A genituors ed a magisters ha’l appellà da promouver surtuot las capacitats intellectualas pro’ls uffants, quai per sdasdar lur plaschair vi da l’imprender.

 

Fin dal 1829 ha Andrea Rosius à Porta, chi’d es mort dal 1838, svess manà l’Institut. Lura ha’l surdat la direcziun a seis duos figls. Seis merit esa dad avair miss la fundamainta pel sectur da l’educaziun in nossa regiun. Davo la fabrica da la lingia da la Viafier retica chi’d es rivada dal 1913 fin a Scuol s’haja fundà l’Institut Otalpin Ftan per mattas. Dal 1976 ha l‘Institut avert las portas eir per mats, e dal 1993 ha’l surgni seis nouv nom: Institut Otalpin Ftan.

Organs e collavuraturs da l’IOF

L’Institut Otalpin Ftan vain manà hozindi sco società anonima.

 

CUSSAGL ADMINISTRATIV DA L’IOF

Jon Peer, president dal cussagl administrativ ed imprenditur          

Beatrice Tschanz, specialista da comunicaziun

Christian Fanzun, president cumünal da Scuol

Duosch Fadri Felix, grond cusglier

Paul Häring, expert da finanzas

Dr. Beat Nägelin, expert da scoula

 

DIRECZIUN

Dr. Prof. Elisabeth Steger Vogt, Directura/CEO

Günter Boos, Vicedirectur

Joe Zangerl, manader da l’internat

Muriel Hüberli, manadra da la classa da sport

Sibylla Pedrini, manadra da gestiun

Michael Fankhauser, manader da marketing

Patricia Peer, head of admissions

Imprender davant üna culissa unica

L’Institut Otalpin Ftan es situà in üna cuntrada unica sur il cumün da Ftan, cun vista vers las Dolomitas da l’Engiadina Bassa. Davant quista culissa han giuvenils tanter 13 e 20 ons la schanza da chattar lur rolla in lur futura vita, da-löntsch davent da l‘ectica e da la canera dal muond.

 

La cuntrada impreschiunanta invida a las scolaras ed als scolars na be ad imprender, ma eir a’s dedichar a diff erentas activitats sportivas – la stà a rampchar, ad ir a sella, ad ir cul mountain-bike; l’inviern a far passlung, ad ir culs skis o cul snowboard. In vicinanza da la scoula maina üna s-chabellera directamaing illa regiun da skis da Motta Naluns. La loipa per far passlung e las vias per ir culla schlitra cun amis o per chaminar cun collegas sun güst davant chasa. Tuot quai tocca a l’IOF pro la vita dal minchadi.

Ftan e seis contuorns

Il territori dal cumün da Ftan – chi tocca uossa pro Scuol – s’extenda da l’otezza da la riva da l’En sün 1200 meters sur mar fin sü pro’l Piz Blaisch Lunga chi ha ün’otezza da 3230 meters. Ftan svess es situà sün 1648 meters sur mar. La populaziun (450 abitantas ed abitants) viva dal turissem e da l’agricultura o lavura sco mansterans o i’l sectur terziar. Cun quai cha Scuol, be ses kilometers davent, spordscha las plü bleras plazzas da lavur, lavuran eir blers a Scuol ed abitan a Ftan.

 

A Ftan, dalöntsch davent da la canera dal muond e situà sün üna terrassa sulagliva, as chatta tuot las comoditats d’ün lö da vacanzas cun bunas structuras, cun üna cordiala ospitalità ed ingio chi’s po as recrear. La s-chabellera, chi’s po ragiundscher sainza fadia a pè, maina directamaing illa regiun per far bellas gitas ed i’l paradis da sport d’inviern da Motta Naluns.

© Hochalpines Institut Ftan AG • Impressum/Rechtliches